Mer om Terje Vigen og aktørene fra Hordaland Teater:

TERJE VIGEN av Henrik Ibsen
Regi: Vera Rostin Wexelsen
Skuespiller: Jan Erik Christensen
Komponist/musiker/tekniker: Kristian Børve
Kostyme: Britt Koldal

Vera Rostin Wexelsen:
Ho har vore teatersjef på Hordaland Teater sidan 1998. Samstundes som ho har vore leiar for Hordaland Teater, har ho mellom anna instruert ”Den riktige vind”, ”Fiskekongen” ” Barnet utan alder” og «Den Svakaste». Ho har og medverka som skodespelar ved Hordaland Teater; i ”Hamlet” og ”Eit menneske kjem til verda”. Tidlegare har ho mellom anna arbeidd som skodespelar og instruktør i Flaminiateatret og ved ulike regionteater, og ho har vore teatersjef ved Nord-Trøndelag Teater.

Jan Erik Christensen:
Han er utdanna dokkespelar og dokkemakar, dekoratør og audiopedagog. Christensen var tilsett ved Oslo Nye Teater sitt dokketeater i fem år. Han kom til Hordaland Teater ved starten i 1987, og har vore tilsett ved teatret sidan. Opp gjennom åra har han hatt mange framsyningar ved Hordaland Teater mellom anna frå ”Fiskekongen” og ”Den lille piken med fyrstikkene” og sist frå «Utgreiing frå eit akademi» av Kafka.

Kristian Børve:
Han har vore tilsett ved Hordaland Teater sidan 2000 som lydansvarleg. Til Vigen-produksjonen har han komponert musikk og spelt inn denne sjølv på ulike instrument.

HENRIK IBSEN (1828-1906)
Diktet om Terje Vigen blei første gang trykt i Illustreret Nyhedsblad i 1862. Blant nordmenn er kan hende dette Ibsen sitt mest folkekjære verk. I fleire generasjonar har menneske over heile landet deklamert ”Terje Vigen” utenat. Unge og gamle, med eller utan litterær bakgrunn, har blitt rørt av denne historia. Ibsen har dikta om enkle og fundamentale menneskelege kjensler og reaksjonar samtidig som forteljinga har ei suveren kunstnerisk utforming.
Framleis lever vitnefaste forteljingar langs Sørlandskysten om modige sjøfolk som i nødsåra før 1814 rodde til Danmark for å hente nokre få tønner korn til dei fattige familiane sine. Då Ibsen budde i Grimstad på 1840-talet, kan det enno ha levd menneske som sjølv hadde vore med på dette. På same måte som Ibsen nokre år seinare henta hovudpersonen i ”Peer Gynt” frå ei ”sann ”historie som verserte på folkemunne, henta han altså også Terje Vigen frå ”det verkelege livet”.
Men Terje Vigen skil seg som person klart frå dei fleste andre mannlege hovudpersonar i Henrik
Ibsen si dikting. Til forskjell frå for eksempel tittelpersonane i ”Brand” og ”Peer Gynt”, tar Terje sine plikter som ektemann og far dødsens alvorleg. Den smålåtne og folkelege sørlands-losen blir, når rekneskapen blir gjort opp, ein berar av nokre av dei eigenskapane Ibsen sette høgast: Personleg mot, truskap og generøsitet.
Ei av Hordaland Teater sine oppgåver er å formidle delar av kulturarven vår. Denne produksjonen er eit eksempel på det. Samtidig er ”Terje Vigen” ei god historie med ein klar moral som har aktualitet også i vår tid: Den som står sigrande att til sist, er den som er sterk nok til å tilgi!
Denne framføringa vil for nokon vere første møte med ”Terje Vigen”, og for andre vil det vere eit kjært gjenhør. Dei som tidlegare sjølve har lese diktet eller høyrt det framført, har ofte si eiga oppleving av tolkinga.
Vårt mål har vore å la Ibsen sin tekst stå så klar og rein som mogleg. Samtidig håpar vi det musikalske underlaget skal vere med å framheve og forsterke handlinga.

av Vera Rostin Wexelsen
Instruktør og teatersjef

Ord og uttrykk:
fokken: skråsegl på staget
tress: seksti
jungmann: ung sjømann i grad mellom dekksgut og matros
briggen: tomasta seglskip med rær på begge
master.
hesplet: å hespa, vinda opp garn eller snøre.
man of war: krigsskip
mers: utkikkplattform i ei av mastene på seglskuter.
korvett: mellomstort orlogsfartøy, bygd som skarpseglar og nytta i vakttenesta.
loss: laus, fri / nytta om tau, trosse, segl på skip).
batalje: kamphandling
prisonen: fengslet
fregatt: fullrigga krigsskip av lettare type med tre master.
patent: lospatent, setifikat som los.
jakt (= yacht), lystfartøy
mylady: tiltale til ei lady, dame av det engelske aristokratiet.
morild: lys frå små organismar, plankton, finst i vatnet når det er mørkt.
le: den sida av fartøyet som vender frå vinden.
luvart: vindsida
stagseil: segl på staget, eit tau eller ein bardun som går på skrå oppover og støttar masta.
Gå over stag- gå baut.
skjøtet: tau frå seglet som nyttast til å halda segla strekte i vinden.
flu: båe eller skjer som er synleg ved lågvatn.

Besøk Hordaland Teater sin hjemmeside.

Registrer deg for å motta email om informasjon om det som skjer.